بجٹ میں عوام سے کئے گئے وعدے انحراف کی بو آتی ہے ۔ سجاد غنی لون

عوام سے کئے گئے وعدوں کو پورا کرنے کیلئے عمر عبداللہ رقومات کہاں سے جٹائیں گے

سرینگر//پیپلز کانفرنس کے صدر اورایم ایل اے ہندوارہ سجاد غنی لون نے عمر عبداللہ سرکار پر الزام لگایا ہے کہ بجٹ بی جے پی کی نئے کشمیر کی توثیق کرتا ہے ۔ انہوں نے بتایاکہ نیشنل کانفرنس نے جو انتخابی منشور میں لوگوں سے وعدے کئے ہیں ان سے اب سرکار انحراف کرتی ہے ۔ انہوںنے یہ بھی کہاکہ ان وعدوںکوپورا کرنے کیلئے سرکار کو خطیر رقم کی ضرورت ہوگی جو کہ مرکزی سرکار کے کسی بڑے پیکیج کے بغیر ناممکن ہے ۔ وائس آف انڈیا کے مطابق پیپلز کانفرنس سجاد غنی لون نے منگل کو وزیر اعلیٰ عمر عبداللہ سے کہا کہ وہ 2014 کے اسمبلی انتخابات کے لیے نیشنل کانفرنس کی پارٹی کے منشور میں کیے گئے انتخابی وعدوں کو عملی جامہ پہنانے کے لیے فائنانسنگ کی اسکیم کو واضح کریں۔بجٹ پر بحث کے دوران اسمبلی میں تقریر کرتے ہوئے، سجاد غنی لون نے کہا کہ بجٹ پچھلے پانچ سالوں میں بی جے پی کی طرف سے پروپیگنڈہ کیے گئے نئے کشمیر بیانیہ کی توثیق کرتا ہے۔لون نے کہاکہ گزشتہ پانچ سالوں میں انہوں نے سیاسی طور پر جو کچھ بھی مسترد کیا ہے، اس کی عکاسی بجٹ میں ہوئی ہے۔سجاد نے کہا کہ جموں و کشمیر حکومت کو اپنے منشور میں این سی کے وعدوں کو عملی جامہ پہنانے کے لیے 60000 کروڑ روپے درکار ہوں گے۔ان وعدوں کے لیے فنانسنگ کی اسکیم کیا ہے؟ آپ یہ رقم کہاں سے جمع کریں گے؟ آپ ان وعدوں کو پورا نہیں کر سکتے جب تک کہ مرکز کی طرف سے آپ کو ایک بڑے پیکج کا وعدہ نہ کیا جائے۔