اِنڈسٹریل ایسو سی ایشن بڑی براہمنا کی وزیر اعلیٰ کے مشیر سے ملاقات

جموں / /عمر کی زیر قیادت حکومت کی جانب سے پیش کئے جانے والے پہلے بجٹ سے قبل بڑی براہمنا اِنڈسٹریز ایسوسی ایشن کے ایک وفد نے آج وزیر اعلیٰ کے مشیر ناصر اسلم وانی سے ملاقات کی اور اَپنے یونٹوں کو منافع بخش بنانے کے لئے مطالبات کی ایک جامع فہرست پیش کی۔ایسوسی ایشن نے جموں و کشمیر کے موجودہ آپریشنل صنعتی یونٹوںکے سپورٹ اور حوصلہ اَفزائی کے لئے ٹرن اوور پر مبنی مراعات کے نفاذ کو بڑھانے کی ضرورت پر زور دیا۔اِس میں صنعتی یونٹوں کو مالی ریلیف کو یقینی بنانے کے لئے ورکنگ کیپٹل اِنٹرسٹ سب وینشن کے لئے وقف بجٹ کی بھی مانگ کی گئی ہے۔ان کے دیگر مطالبات میں مقامی ایم ایس ایم ایز کے لئے قیمت اور خریداری کی ترجیحات متعارف کرنا شامل ہے تاکہ ان کی مسابقت اور مارکیٹ شیئر کو بڑھایا جاسکے۔ وفد نے جموں و کشمیر میں موجودہ صنعتی یونٹوں کے لئے لیز ہولڈر کے حقوق کو فری ہولڈ حقوق میں تبدیل کرنے کے اَقدامات کا بھی مطالبہ کیا۔اِس کے علاوہ اُنہوں نے اِنڈسٹریل اسٹیٹ بڑی براہمنا میں بنیادی ڈھانچے کی اَپ گریڈیشن، جی ایس ٹی سے منسلک مراعات، تمام سرکاری محکموں کے ذریعے کاروبار کرنے میں آسانی کے اصولوں کو اَپنانے، بشمول منظوریوں اور عمل کو آسان کرنے کے لئے سنگل وِنڈو سسٹم پر آن بورڈِنگ کا مطالبہ کیا۔وفد نے اِس بات پر زور دیا کہ یہ اَقدامات صنعتی شعبے کی ترقی اور خطے میں مزید سرمایہ کاری کو راغب کرنے کے لئے اہم ہیں۔وزیراعلیٰ کے مشیر نے وفد کے مسائل کو بغور سنا اور اُنہیں ان کے حقیقی مسائل کے حل کے لئے حکومت کے عزم کی یقین دہانی کی۔ اُنہوں نے کہا کہ عمر عبداللہ کی قیادت والی حکومت کاروبار دوست ماحول پیدا کرنے اور صنعتی شعبے کی ترقی کو یقینی بنانے پر توجہ مرکوز کر رہی ہے۔وفد کی قیادت ایسوسی ایشن کے صدر للت مہاجن نے کی جبکہ سینئر نائب صدر، جنرل سیکرٹری اور ایسوسی ایشن کی ایگزیکٹو کمیٹی کے متعدد ممبران سمیت دیگر ممبران بھی مشیر سے ملاقات کے لئے اُن کے ہمراہ تھے۔یہاں یہ بات قابل ذِکر ہے کہ ان کے علاوہ جموں و کشمیر کے متعدد وفود نے مشیرموصوف سے ملاقات کی اور اُنہیں اَپنے مطالبات سے آگاہ کیا۔ اُنہوں نے ان وفود کو یقین دِلایا کہ وہ ان کے مطالبات کو جلد از جلد حل کرنے کے لئے تمام ضروری اَقدامات اُٹھائے جائیں گے۔