پٹنہ میں اپوزیشن لیڈروں کی میٹنگ محض ’فوٹو سیشن‘, راہول باباکو ہر چیز پر تنقید کرنے کی عادت:مرکزی وزیر داخلہ امت شاہ
جموں//مرکزی وزیر داخلہ امت شاہ نے جمعہ کو پٹنہ میں اپوزیشن لیڈروں کی میٹنگ کو ’فوٹو سیشن‘ قرار دیتے ہوئے کہا کہ ان کا اتحاد تقریباً ناممکن ہے اور انہیں اگلے لوک سبھا انتخابات میں شکست کا سامنا کرنا پڑے گا۔جے کے این ایس کے مطابق یہاں بھگوتی بگرمیں ایک عوامی ریلی سے خطاب کرتے ہوئے امت شاہ نے کانگریس لیڈر راہول گاندھی پر بھی تنقید کی اور کہا کہ راہول باباکو ہر چیز پر تنقید کرنے کی عادت ہے۔ بہار کی راجدھانی پٹنہ میں جاری اپوزیشن میٹنگ کا حوالہ دیتے ہوئے مرکزی وزیرداخلہ امت شاہ نے کہاکہ پٹنہ میں ایک فوٹو سیشن ہو رہا ہے۔ تمام اپوزیشن لیڈر ایک پلیٹ فارم پر اکٹھے ہوئے ہیں تاکہ یہ پیغام دیا جائے کہ وہ بی جے پی، این ڈی اے اور مودی کو (2024 میں) چیلنج کریں گے۔انہوں نے کہا کہ میں ان اپوزیشن لیڈروں سے صرف اتنا کہنا چاہتا ہوں کہ آپ کا اتحاد تقریباً ناممکن ہے اور اگر یہ حقیقت بھی ہو جائے تو براہ کرم عوام کے سامنے آئیں۔امت شاہ نے دعویٰ کیاکہ 2024 میں مودی جی کی 300 سے زائد سیٹوں کے ساتھ واپسی یقینی ہے۔وزیر اعظم نریندر مودی کے امریکی دورے کا حوالہ دیتے ہوئے، امت شاہ نے کہا، کہ خاص طور پر خلائی، دفاع اور سیمی کنڈکٹرز کے میدان میں بہت سارے معاہدے ہو رہے ہیں۔ دنیا کی بڑی کمپنیاں اب وزیر اعظم کی قیادت میں ہندوستان میں سرمایہ کاری میں دلچسپی لے رہی ہیں۔انہوں نے زور دے کر کہا کہ9سال کے عرصے میں مودی نے ہندوستان کو دنیا کی پانچویں سب سے بڑی معیشت بنا دیا ہے جسے پہلے11ویں نمبر پر رکھا گیا تھا۔راہول گاندھی پر تنقید کرتے ہوئے انہوں نے کہا کہ ’’راہل بابا کو تنقید کرنے کی عادت ہے، چاہے وہ دفعہ 370 کی منسوخی ہو، رام مندر کی بنیاد ہو یا تین طلاق پر پابندی‘‘۔امت شاہ نے کہاکہ2024 میں راہول گاندھی وزیر اعظم کے عہدے کیلئے مودی جی کے خلاف میدان میں اتریں گے لیکن عوام جانتے ہیں کہ کس کا انتخاب کرنا ہے۔مرکزی وزیر داخلہ امت شاہ نے عوام سے مخاطب ہوکرکہاکہکیا آپ مودی کو ایک بار پھر وزیر اعظم بنائیں گے تاکہ اس بات کو یقینی بنایا جا سکے کہ جموں کشمیر پھلے پھولے اور محفوظ ترین جگہ بنے؟۔
