زعفران کی پیداوار میں 67 فیصد سے زیادہ کی کمی/ مرکز
سرینگر// مرکز ی حکومت نے انکشاف کیا ہے کہ 2010 سے 2024 تک زعفران کی پیداوار میں 67 فیصد سے زیادہ کی کمی آئی ہے، تاہم گزشتہ سال پیداوار میں 4 فیصد کا معمولی اضافہ ہوا ہے۔ٹی ای این کے مطابق نیشنل کانفرنس کے رکن پارلیمنٹ حسنین مسعودی کے ایک سوال کے جواب میں، زراعت اور کسانوں کی بہبود کے وزیر ارجن منڈا نے پارلیمنٹ کو بتایا کہ جموں و کشمیر کے فنانشل کمشنر (ریونیو) کے دفتر کے فراہم کردہ تخمینوں کے مطابق جموں و کشمیر میں زعفران کی پیداوار 2010-11 میں 8.0 MT سے کم ہو کر 2023-24 میں 2.6 MT رہگئی ہے، جس کے نتیجے میں اس مدت کے دوران پیداوار میں مجموعی طور پر تقریباً 67.5 فیصد کمی واقع ہوئی ہے۔ تاہم، گزشتہ ایک سال کے دوران 2022-23 سے 2023-24 تک، زعفران کی پیداوار میں 4 فیصد کا معمولی اضافہ ہوا ہے۔انہوں نے کہا کہ جموں و کشمیر کے پلاننگ اینڈ ایگریکلچر پروڈکشن ڈیپارٹمنٹ سے موصول ہونے والی معلومات کے مطابق مشن کے تحت منظور کیے گئے 128 گہرے بور ویلوں میں سے 123 کو محکمہ باغبانی نے تعمیر کر کے مکینیکل انجینئرنگ ڈیپارٹمنٹ، کشمیر کے حوالے کیا ہے۔ مکینیکل انجینئرنگ ڈیپارٹمنٹ، کشمیر نے 2187.08 ہیکٹر کی کمانڈ کے ساتھ 73 گہرے بور ویلوں کو اسپرنکلر ایریگیشن سسٹم کے ساتھ کامیابی سے جوڑا ہے۔ تاہم، آبپاشی کی سہولیات کا پوری طرح سے استعمال نہیں کیا جا رہا ہے کیونکہ ان بور ویلوں کے انتظام اور دیکھ بھال کے لیے صارف گروپ مشن کے رہنما خطوط کے مطابق نہیں بنائے گئے ہیں اور انہیں کسان صارف گروپوں کے حوالے نہیں کیا گیا ہے۔انہوں نے مزید کہا کہجموں وکشمیرکے پلاننگ، ایگریکلچر پروڈکشن ڈیپارٹمنٹ سے موصول ہونے والی معلومات کے مطابق، کسی بھی صنعتی اداروں سے سیمنٹ کی دھول جیسے عوامل کی وجہ سے زعفران کے پھولوں پر منفی اثرات کی کوئی اطلاع نہیں ہے۔محکمہ زراعت ریونیو حکام کے ساتھ مل کر زعفران ایکٹ، زعفران قوانین اور دیگر محصولات کے قوانین کو لاگو کر رہے ہیں جو زعفران کی زمین کو کسی دوسرے مقاصد کے لیے موڑنے سے محفوظ رکھتے ہیں۔زعفران کی پیداوار کی گرتی ہوئی حالت پر غور کرنے کے لیے حکومت کی طرف سے کوئی اعلیٰ سطحی کمیٹی تشکیل نہیں دی گئی ہے۔مرکز نے یوٹی انتطامیہ پر زور دیا ہے کہ وہ جموں و کشمیر میں قومی زعفران مشن کے تحت شروع کی گئی تمام سرگرمیوں کا تفصیلی جائزہ لے تاکہ جموں کشمیرمیں زعفران سیکٹر کی مجموعی ترقی کے لیے قومی زعفران مشن کے تحت بنائے گئے بنیادی ڈھانچے اور سہولیات کے موثر استعمال کو یقینی بنایا جا سکے۔
