کابل//ایم این این//مہاجرین کے مسائل سے نمٹنے کے کمیشن نے اعلان کیا ہے کہ گزشتہ ماہ ایران اور پاکستان سے 238,700 سے زائد افراد افغانستان واپس جا چکے ہیں۔کمیشن کے ترجمان احمد اللہ واثق نے بتایا کہ اس عرصے کے دوران طورخم اور اسلام قلعہ کراسنگ سے 12,600 خاندانوں کو کابل اور پھر ان کے صوبوں تک پہنچایا گیا۔احمد اللہ واثق نے بتایا کہپڑوسی ممالک سے افغان باشندوں کی بے دخلی کا سلسلہ تاحال جاری ہے، اور گزشتہ ایک ماہ میں ایران اور پاکستان سے 238,700 سے زائد افراد واپس آ چکے ہیں۔ اس دوران تقریباً 12,600 خاندانوں کو پہلے کابل اور پھر اپنے اپنے علاقوں میں منتقل کیا گیا۔دریں اثنا، بہت سے واپس آنے والے حکومت سے مطالبہ کر رہے ہیں کہ انہیں ملازمتیں، پناہ گاہ اور تعلیم تک رسائی فراہم کی جائے۔38 سالہ اسماعیل، جنہوں نے اپنی زندگی کا بیشتر حصہ پاکستان میں گزارا، نے پاکستانی پولیس کے ناروا سلوک کا حوالہ دیا اور واپسی پر اپنی مشکلات اور پناہ گزینوں کی زندگی کی تلخ یادیں بتائی ۔ماضی میں، ہم نے پاکستان میں اچھی زندگی گزاری، لیکن حال ہی میں پاکستانی حکومت نے مہاجرین پر بہت ظلم کیا۔واپس آنے والے افراد امارت اسلامیہ سے اپنی فوری ضروریات کے طور پر پناہ، ملازمت کے مواقع، بچوں کی تعلیم اور گمشدہ اثاثوں کے معاوضے کا مطالبہ کر رہے ہیں۔پاکستان سے جلاوطن محب اللہ نے کہا کہہم چاہتے ہیں کہ امارت اسلامیہ ہمیں مزید مدد فراہم کرے کیونکہ ہم پناہ گزین ہیں اور اپنی پوری زندگی پاکستان میں گزاری ہے۔ اب یہاں ہمارے پاس کچھ نہیں ہے۔ایک اور جلاوطن عبداللطیف نے کہا کہہم چاہتے ہیں کہ امارت اسلامیہ ہمیں ہمارے بچوں کے لیے نوکری اور تعلیم فراہم کرے۔کچھ ٹرک ڈرائیوروں نے بتایا کہ وہ ہر ہفتے کئی صوبوں کا سفر کرتے ہیں تاکہ جلاوطن مہاجرین کے سامان کو ان کے گھروں تک پہنچایا جا سکے۔ٹرک ڈرائیور نور محمد نے کہا کہچاہے وہ بغلان ہو، قندوز ہو یا کوئی اور صوبہ، ہم ان کی خدمت کے لیے حاضر ہیں۔مہاجرین کے مسائل کے حل کے لیے کمیشن کے حکام نے یہ بھی یقین دلایا کہ ملک بدر کیے گئے مہاجرین کو مختلف علاقوں میں اضافی خدمات فراہم کرنے کے لیے مزید کوششیں کی جا رہی ہیں۔
