جموں و کشمیر حکومت کے لیے نان ٹیکس ریونیو کا اہم ذریعہ بن کر ابھرا
سرینگر/ یو این ایس// اقتصادی سروے کے مطابق جموں و کشمیر کے ٹرانسپورٹ شعبے نے مالی سال 2024-25کے دوران حکومت کو 942.22 کروڑ روپے کی آمدنی فراہم کی، جس کے ساتھ یہ شعبہ یونین ٹریٹری کے مالی ڈھانچے میں ایک اہم نان ٹیکس ریونیو ذریعہ بن کر سامنے آیا ہے۔ رپورٹ کے مطابق رواں مالی سال 2025-26کے پہلے نو ماہ میں ہی 706.35 کروڑ روپے کی وصولی ہو چکی ہے، جو ٹرانسپورٹ سے وابستہ محصولات میں مسلسل اضافے کی نشاندہی کرتی ہے۔یو این ایس کے مطابق سرکاری اعداد و شمار کے مطابق، مالی سال 2024-25کے لیے 1,430 کروڑ روپے کے نظرثانی شدہ ہدف کے مقابلے میں محکمہ ٹرانسپورٹ نے گاڑیوں کی رجسٹریشن، روٹ پرمٹس، ڈرائیونگ لائسنس، فٹنس سرٹیفکیٹس اور دیگر ضابطہ جاتی خدمات کے ذریعے 942.22 کروڑ روپے جمع کیے۔ موجودہ مالی سال میں دسمبر تک 1,530 کروڑ روپے کے ہدف** کے مقابلے میں 706.35 کروڑ روپے حاصل کیے جا چکے ہیں، جس سے آمدنی کے مستحکم بہاؤ کا عندیہ ملتا ہے۔اقتصادی سروے میں بتایا گیا ہے کہ اس آمدنی میں اضافہ گاڑیوں کی تعداد میں تیزی سے توسیع اور لائسنسنگ سرگرمیوں میں نمایاں اضافے کا نتیجہ ہے۔ مارچ 2025 تک یونین ٹریٹری میں رجسٹرڈ گاڑیوں کی مجموعی تعداد 27.36 لاکھ تک پہنچ چکی ہے۔ صرف مالی سال 2024-25کے دوران 1.69 لاکھ نئی گاڑیاں شامل ہوئیں، جبکہ رواں مالی سال میں دسمبر تک 1.47 لاکھ مزید گاڑیاںرجسٹرڈ کی گئیں، جو محصولات اور فیسوں میں اضافے کا باعث بنیں۔ضلع وار اعداد و شمار کے مطابق، جموں ضلع میں 10.61 لاکھ سے زائد گاڑیاں رجسٹرڈ ہیں، جو پورے جموں و کشمیر میں سب سے زیادہ ہیں، جبکہ سرینگر ضلع میں 4.71 لاکھ سے زائد گاڑیاں موجود ہیں۔ یہ دونوں اضلاع رجسٹریشن اور آمدنی میں سب سے بڑا حصہ رکھتے ہیں۔محکمہ ٹرانسپورٹ کی جانب سے روٹ پرمٹس اور ڈرائیونگ لائسنس خدمات میں بھی نمایاں توسیع دیکھنے میں آئی۔ مالی سال 2024-25میں 12,332 نئے روٹ پرمٹس جاری کیے گئے جبکہ 21,289 پرمٹس کی تجدید کی گئی۔ اسی مدت کے دوران 98,739 نئے ڈرائیونگ لائسنس جاری اور 81,857 لائسنسوں کی تجدید عمل میں آئی۔ کمرشل گاڑیوں کے لیے 13,558 نئے فٹنس سرٹیفکیٹس اور 91,644 فٹنس سرٹیفکیٹس کی تجدید کی گئی۔رواں مالی سال میں بھی یہ سلسلہ جاری ہے۔ دسمبر تک 1,01,191 نئے ڈرائیونگ لائسنس جاری اور 70,153 لائسنسوں کی تجدید کی جا چکی ہے۔ اس کے علاوہ 7,466 نئے روٹ پرمٹس، 10,130 تجدیدی پرمٹس اور 82 ہزار سے زائد گاڑیوں کے فٹنس سرٹیفکیٹس جاری کیے گئے۔یو این ایس کے مطابق اقتصادی سروے کے مطابق گزشتہ چند برسوں میں ٹرانسپورٹ شعبے کی آمدنی میں مسلسل اضافہ ہوا ہے۔ **2021-22 میں 629.65 کروڑ روپے، 2022-23میں 762.63 کروڑ روپے، 2023-24میں 925 کروڑ روپے اور 2024-25میں 942.22 کروڑ روپے کی وصولی ہوئی۔ رواں مالی سال میں اب تک کی آمدنی کو دیکھتے ہوئے محکمہ ایک اور مضبوط کارکردگی کی راہ پر گامزن ہے۔سروے میں اس بہتری کی وجہ ڈیجیٹل اصلاحات اور خدمات کی بہتری کو قرار دیا گیا ہے۔ گاڑیوں کی رجسٹریشن اور ڈرائیونگ لائسنسنگ جیسے اہم عمل واہن اور سارتھی پورٹلز کے تحت آن لائن کر دیے گئے ہیں، جس سے شفافیت اور رفتار میں اضافہ ہوا ہے۔ متعدد خدمات کو پبلک سروسز گارنٹی ایکٹ کے تحت وقت مقررہ میں فراہم کیا جا رہا ہے، جبکہ ڈرائیور ٹریننگ و انسپکشن مراکز اور ایپ بیسڈ ٹیکسی خدمات کے لیے ایگریگیٹر لائسنسنگ جیسے اقدامات بھی متعارف کرائے جا رہے ہیں۔اقتصادی سروے کے مطابق بڑھتی ہوئی گاڑیوں کی تعداد، لائسنس اور پرمٹس میں اضافہ اور ڈیجیٹل نظام کی مضبوطی کے باعث ٹرانسپورٹ شعبہ نہ صرف نقل و حرکت کو سہولت فراہم کر رہا ہے بلکہ جموں و کشمیر حکومت کے لیے ایک قابلِ اعتماد آمدنی کا ذریعہ بھی بنتا جا رہا ہے۔
