تین روزہ تلاش کے بعد فوجی جوان کی لاش ملی؛ فوجی اعزازات کی تیاری جاری
سرینگر/وی او آئی//کوکرناگ کے جنگلات میں دہشت گردی مخالف آپریشن کے دوران اچانک لاپتہ ہوئے دو سرے فوجی کی لاش جمعہ کے روز برآمد کرلی گئی ہیں جبکہ گزشتہ روز ایک فوجی کی لاش ملی تھی ۔یہ دونوں فوجی آپریشن کے دوران موسم کی خرابی کے بعد لاپتہ ہوئے تھے ۔ وائس آف انڈیا کے مطابق جنوبی کشمیر کے کوکرناگ کے بلند و بالا برف پوش علاقوں سے ایک اور پیراٹروپر کی لاش برآمد ہوئی ہے۔ یہ بازیابی اْس شدید برفانی طوفان کے تین دن بعد ہوئی ہے جس کے دوران دو فوجی جوان انسدادِ عسکریت پسندی کی کارروائی کے دوران لاپتہ ہو گئے تھے۔سرکاری ذرائع کے مطابق، خراب موسم کے باعث دونوں اہلکاروں سے رابطہ منقطع ہونے کے فوراً بعد شروع کی گئی تلاش اور بچاؤ کی کارروائی کے دوران دوسرے فوجی کی لاش ملی۔ اس سے قبل، اسی علاقے سے ایک پیراٹروپر کی لاش برآمد کی جا چکی ہے۔ دونوں اہلکار ایک خصوصی آپریشن ٹیم کا حصہ تھے جو کوکرناگ کے برفانی علاقوں میں تلاشی مہم پر مامور تھی۔دوسرے فوجی کی بازیابی کے ساتھ ہی دشوار گزار راستوں اور منجمد درجہ حرارت کے باوجود جاری رہنے والی شدید تلاش کا اختتام ہوا۔ فوجی ذرائع کے مطابق، شہید اہلکار کی باقیات کو شناخت اور فوجی اعزازات کی تکمیل کے لیے روانہ کیا جائے گا۔
