کولگام میں بلاک دیوس کے تحت عوامی رَسائی پروگرام کا اِنعقاد

کولگام// اَیڈیشنل ڈپٹی کمشنر (اے ڈی سی) کولگام وقار احمد گیری نے عوامی شکایات اور مطالبات کا براہ ِراست جائزہ لینے کے لئے آج کولگام میں ہفتہ وار’’ بلاک دیوس‘‘ کے ایک حصے کے طور پر منعقدہ ایک عوامی رَسائی پروگرام کی صدارت کی۔اِس موقعہ پر ضلعی اِنتظامیہ کے دیگر افسران بھی موجود تھے۔مختلف علاقوں کے وفود نے اے ڈی سی کو اپنے مسائل سے آگاہ کیا اور اپنے مطالبات پیش کئے۔ اَفسران نے موقعہ پراَپنے محکموں سے متعلق لوگوں کے سوالات اور مطالبات کا جواب دیا۔اے ڈی سی نے عوام کو توجہ سے سننے کے بعد فوری نوعیت کی شکایات کو موقعہ پر ہی حل کیا اور یقین دِلایا کہ بقیہ جائز مسائل اور شکایات کا بروقت اَزالہ کیا جائے گا۔دریں اثنا، ڈی ایچ پورہ اور دیوسر میں شکایات کے ازالے کے کیمپ کا بھی اِنعقاد کیا گیا جہاں متعلقہ اَفسران نے عوام کے مسائل اور مطالبات بغور سنا اور بروقت ازالے کا یقین دلایا۔