الیکشن سے متعلق فرائض کی اَنجام دہی میں الیکشن کمیشن کے وضع کردہ طریقہ کار اوررہنماخطوط پر سختی سے عمل کرنے کی ہدایت دی
بانڈی پورہ// ڈِسٹرکٹ الیکشن آفیسربانڈی پورہ منظور احمد قادری نے منی سیکرٹریٹ بانڈی پورہ میں منعقدہ ایک میٹنگ میں اِنتخابی تیاریوں کا تفصیلی جائزہ لیا۔اُنہوںنے ریٹرننگ اَفسروں ( آر اوز) اور نوڈل اَفسران کی طرف سے ضلع میں آئندہ اسمبلی اِنتخابات کی تیاریوں کا بغور جائزہ لیا۔دورانِ میٹنگ آر او 15 ۔بانڈی پورہ نے اسمبلی حلقہ 15 ۔بانڈی پورہ کے اندر تیاریوں کے بارے میں تفصیلی جانکاری فراہم کی جبکہ آر او 14 ۔سوناواری وایس ڈی ایم سنبل اور آر او 16 ۔گریز نے اپنے اپنے حلقوں میں اُٹھائے گئے اَقدامات کا خاکہ پیش کیا۔میٹنگ میں انکشاف کیا گیا کہ ضلع بھر میں اِنتخابات کے پرامن اِنعقاد کے لئے تمام انتظامات مکمل کئے گئے ہیں جن میں ضلع بھر میں خصوصی اور منفرد پولنگ سٹیشنوں کا قیام بھی شامل ہے۔بات چیت میں لاجسٹکس کا بھی احاطہ کیا گیا جس میں پولنگ پارٹیوں کے لئے روٹ پلان اور دیگر ضروری انتظامات شامل ہیں۔مزید برآں، ڈِسٹرکٹ الیکشن آفیسر نے اِنتخابی تربیتی پروگراموں، ہوم ووٹنگ کے اَقدام اور بوتھ لیول بیداری گروپوں کی سرگرمیوں کی صورتحال کا جائزہ لیا۔اُنہوں نے تمام متعلقہ افسران کی مکمل تربیت کی ضرورت پر زور دیا تاکہ اس بات کو یقینی بنایا جاسکے کہ عملہ کا ہر رکن اپنے انتخابات سے متعلق فرائض سے بخوبی واقف ہو۔ نوڈل آفیسر اے ایم ایف کو ہدایت دی گئی کہ وہ اس بات کو یقینی بنائیں کہ تمام پولنگ سٹیشنوں کو پہلے ہی یقینی کم سے کم سہولیات سے آراستہ کیا جائے۔ڈِسٹرکٹ الیکشن آفیسر نے نوڈل اَفسروں سے کہا کہ وہ کسی بھی ممکنہ چیلنجوں کو فعال طور پر حل کریں اور ایک اچھی طرح سے منظم اِنتخابی عمل کو یقینی بنائیں۔اُنہوں نے آر اوز اور نوڈل افسران سے کہا کہ وہ الیکشن سے متعلق فرائض کی انجام دہی میں ای سی آئی کی وضع کردہ طریقہ کار اور رہنما خطوط پر سختی سے عمل کریں۔میٹنگ میں اے ڈی سی،نوڈل آفیسر ایم سی سی ظفر حسین شوال، ڈپٹی ڈِی اِی او محمد رفیق بٹ، آر او 15 ۔بانڈی پورہ شبیر احمد وانی، الیکشن نوڈل افسران اور دیگر متعلقین نے شرکت کی۔اِس سے قبل ڈِسٹرکٹ الیکشن آفیسر نے منی سیکرٹریٹ میں قائم میڈیا سرٹیفکیشن اینڈ مانیٹرنگ کمیٹی (ایم سی ایم سی) کا دورہ کیا تاکہ اس کے کام کاج کا جائزہ لیا جاسکے اور اسمبلی اِنتخابات کی تیاریوں کو یقینی بنایا جاسکے۔اُنہوں نے اِنتخابی ضوابط کی تعمیل کو یقینی بنانے کے لئے میڈیا مواد کی تصدیق اور میڈیا کوریج کی نگرانی کے لئے ایم سی ایم سی کے عمل کا جائزہ لیا۔
