وادی کشمیر میں امسال سیاحوں کے بڑھتے رش کے بیچ سیاحتی مقام پہلگام مقامی و غیر مقامی سیاحوں کی پہلی پسند بن چکی ہے اور گزشتہ چار ماہ کے دوران 3لاکھ سے زائد سیاحوں نے پہلگام کا رخ کیا ہے اور وہاں قدرتی نظاروں سے لطف اندوز ہو گئے ہیں۔ادھر حکام کا کہنا ہے کہ آنے والے مہینے میں سیاحوں کی تعداد میں مزید اضافہ ہوگا ۔ وادی کشمیر میںامسال ابھی تک سیاحوں کا بھار ی رش دیکھنے کو ملا جس کے نتیجے میں شعبہ سیاحت سے وابستہ افراد بھی مطمئن نظر آتے ہیں ۔ سیاحوں کے رش کا انداز ہ اس بات سے لگایا جاتا سکتا ہے کہ گزشتہ چار ماہ میں سیاحتی مقام پہلگام میں 3لاکھ سے زائد سیاحوں کی آمد ریکارڈ کی گئی جن میں ملکی اور غیر ملکی دونوں سیاح بھی شامل ہیں، جنہوں نے اس خطے کی خوبصورتی کو دیکھا۔پہلگام ڈیولپمنٹ اتھارٹی کے چیف ایگزیکٹیو آفیسر طارق حسین نائیک نے کہا کہ اس سال کے پہلے چار مہینوں میں تین لاکھ سے زیادہ سیاحوں بشمول 7000 غیر ملکیوں نے پہلگام کا دورہ کیا۔نائک کے مطابق سیاحوں کی تعداد میں اضافے سے پہلگام میں سیاحت کے اسٹیک ہولڈرس میں خوشی کی لہر دوڑ گئی ہے۔دکانداروں، ٹٹو والوں، ہوٹل والوں اور دیگر نے سیاحوں کی تعداد میں اضافے پر اطمینان کا اظہار کیا ہے، کیونکہ یہ ان کی روزی روٹی سے براہ راست تعلق رکھتا ہے۔ایک ہوٹل مالک، ذاکر احمد نے کہا کہ ہوٹلوں میں قبضے کی شرح بڑھ رہی ہے۔ انہوں نے مزید کہا کہ پہلگام کے تقریباً تمام ہوٹل اگلے مہینے کیلئے مکمل طور پر بک ہو چکے ہیں۔انہوں نے کہا کہ فی الحال، پورا پہلگام کھچا کھچ بھرا ہوا ہے اور تقریباً تمام ہوٹل اگلے مہینے کیلئے بک کر لیے گئے ہیں۔محکمہ سیاحت کے ایک اہلکار نے بتایا کہ پہلگام میں موسم پوری طرح سے کھل رہا ہے اور روزانہ ہزاروں سیاح اس مقام کی سیر کر رہے ہیں۔انہوں نے کہا کہ ہر گزرتے دن کے ساتھ، پہلگام آنے والے سیاحوں کی تعداد میں اضافہ ہو رہا ہے اور آنے والے ہفتوں میں اس میں مزید اضافہ ہو گا۔اہلکار نے کہا کہ پہلگام میں ہزاروں سیاح رات کیلئے قیام کرتے ہیں اور اس جگہ پر آنے والے مقامی اور گھریلو سیاحوں کی تعداد میں کئی گنا اضافہ ہو جائے گا۔
