سڑکوں، نالیوں اور عوامی جگہوں پر گندگی سے عوامی صحت کو خطرہ، انتظامیہ کی سخت کارروائی
سرینگر/وی او آئی//شمالی کشمیر کے پٹن بلاک میں انتظامیہ نے ہفتہ کو عوامی جگہوں پر گوبر، مویشیوں کا فضلہ اور تعمیراتی ملبہ پھینکنے پر مکمل پابندی عائد کر دی ہے۔ یہ فیصلہ عوامی شکایات کے بعد لیا گیا جن میں بدبو، گندگی اور صحت کے مسائل کی نشاندہی کی گئی تھی۔ بلاک ڈویلپمنٹ آفیسر پٹن کے دفتر کی جانب سے کی گئی معائنہ رپورٹ میں سڑکوں کے کنارے، دیہاتی راستوں، نالیوں، آبپاشی چینلز، سرکاری زمین اور عوامی سہولتوں کے قریب کچرا پھینکنے کی تصدیق ہوئی۔ حکام نے کہا کہ اس عمل سے آبی ذخائر آلودہ ہو رہے ہیں، عوامی راستے بند ہو رہے ہیں، صحت کے خطرات بڑھ رہے ہیں اور آوارہ جانوروں کی آمد سے مقامی لوگوں کو پریشانی کا سامنا ہے۔ انتظامیہ نے واضح کیا ہے کہ سڑکوں،نالیوں، چشموں، آبپاشی چینلز، سرکاری عمارتوں، اسکولوں، آنگن واڑی مراکز، پنچایت گھروں اور کھلے مقامات پر کچرا پھینکنا سختی سے ممنوع ہے۔تمام خلاف ورزی کرنے والوں کو ہدایت دی گئی ہے کہ وہ سات دن کے اندر کچرا صاف کریں ورنہ کارروائی کی جائے گی۔ مقامی دیہات کے لوگوں نے بار بار شکایت کی تھی کہ نالیوں اور سڑک کناروں پر کچرا ڈالنے سے صفائی کے مسائل بڑھ رہے ہیں۔ بلاک انتظامیہ کی زمینی جانچ میں بھی یہ بات سامنے آئی کہ سابقہ انتباہات کے باوجود کچرا پھینکنے کا سلسلہ جاری ہے۔ یہ اقدام علاقے میں صفائی، صحت اور عوامی سہولتوں کو بہتر بنانے کے لیے اٹھایا گیا ہے۔
