سرینگر / /امرناتھ یاترا کیلئے سیکورٹی انتظامات اور لائن آف کنٹرول پر فوجی تیاریوں کا جائزہ لینے کیلئے وزیر دفاع راج ناتھ سنگھ 17 جون کو جموں کا دورہ کریں گے جبکہ ساتھ ہی وہ مہاراجہ گلاب سنگھ کی تاج پوشی کے 200 سال کی تقریبات میں شرکت کریں گے۔ سی این آئی کے مطابق 30 جون سے شروع ہونے والی امرناتھ یاترا اور ٹارگٹ کلنگ کے پیش نظر وزیر دفاع راجناتھ سنگھ جموں کے دورے پر وار د ہو رہے ہیں جس دوران وہ سیکورٹی انتظامات کا جائزہ لیں گے ۔ اس کے علاوہ راجناتھ سنگھ مہاراجہ گلاب سنگھ کی تاج پوشی کے 200 ویں سال کے موقع پر منعقد ہونے والی تقریب میں شرکت کریں گے۔ تقریب کا اہتمام ہری نواس میں کیا جا رہا ہے۔ذرائع نے بتایا کہ اس تقریب میں جموں و کشمیر کے کئی معززین شرکت کریں گے۔ انہوں نے مزید کہا کہ یہ تقریب ایک عظیم الشان تقریب ہوگی اور راج ناتھ سنگھ نے تقریبات میں شرکت کے لیے اپنی رضامندی دی ہے۔وزیر دفاع سے یہ بھی توقع ہے کہ وہ جموں و کشمیر میں لائن آف کنٹرول کے ساتھ ساتھ فوجیوں کی تیاریوں کا جائزہ لیں گے اور بالخصوص وادی میں امرناتھ یاترا کیلئے سیکورٹی انتظامات کا جائزہ لینے کیلئے میٹنگ کی صدارت کریں گے ۔ یہاں یہ بات قابل ذکر ہے کہ امرناتھ یاتریوں کی حفاظت میں فوج اہم کردار ادا کرنے جا رہی جس میں جموں سرینگر قومی شاہراہ پر پہلگام کے نونوان، گاندربل میں بالتل، جڑواں ٹریکس اور غار کی کے ساتھ نیم فوجی دستوں کے بیس کیمپوں کے ساتھ فوج کو تعینات کیے جانے کا امکان ہے۔ وزارت دفاع نے پہلے ہی جنوبی کشمیر کے ہمالیہ میں یاترا کے آسانی سے انعقاد کے لیے ہر ممکن مدد کی یقین دہانی کرائی ہے۔جہاں تک لائن آف کنٹرول پر صورتحال کا تعلق ہے، ذرائع کا کہنا ہے کہ گزشتہ سال فروری کے بعد جب ہندوستان اور پاکستان کے درمیان تازہ جنگ بندی کا معاہدہ عمل میں آیا تھا تب سے جنگ بندی کی کوئی بڑی خلاف ورزی کے ساتھ یہ معمول کی بات ہے۔ تاہم عسکریت پسندوں کی طرف سے دراندازی کی کچھ کوششیں کی جاتی ہیں جنہیں فوجیوں نے کامیابی سے ناکام بنا دیا ہے۔
