سنسکرت سبھاشِتم کے ذریعے ایثار، خودسپردگی اور انتودیہ فلسفے کی ترجمانی
سرینگر// یو این ایس// وزیر اعظم نریندر مودی نے قوم کی فکری، اخلاقی اور صنعتی سمت کو واضح کرتے ہوئے ایک جانب ملک اور انسانیت کی خدمت پر مبنی سنسکرت سبھاشِتم شیئر کیا، جبکہ دوسری جانب کاربن کیپچر ٹیکنالوجی کو بھارت کے آئندہ اسٹیل انقلاب کے لیے ایک فیصلہ کن ستون قرار دیا ہے۔ وزیر اعظم کے یہ دونوں اقدامات بھارت کے فکری ورثے اور جدید ترقیاتی وڑن کے امتزاج کی عکاسی کرتے ہیں۔یو این ایس کے مطابق وزیر اعظم نے جو سنسکرت سبھاشِتم شیئر کیا، وہ مکمل لگن، خلوص اور خودسپردگی کے اعلیٰ قومی جذبے کی نمائندگی کرتا ہے۔ یو این ایس کے مطابق اس سبھاشِتم کے ذریعے ملک کی جغرافیائی عظمت، قدرتی شان اور تہذیبی وقار کو علامتی انداز میں پیش کیا گیا ہے۔ اس کا مفہوم یہ پیغام دیتا ہے کہ جس سرزمین کی عظمت کو ہمالیہ کی بلندیوں نے دوام بخشا ہو، جس کی شان دریاؤں کے بہاؤ کے ساتھ سمندر میں تحلیل ہوتی ہو اور جس کے آگے سمتیں طاقتور بازوؤں کی مانند جھک جاتی ہوں، اس ملک کے لیے انسان کو اپنا سب کچھ خلوص کے ساتھ نچھاور کر دینا چاہیے۔وزیر اعظم نے اس موقع پر کہا کہ انتودیہ کے علمبردار پنڈت دین دیال اْپادھیائے نے بھی اسی جذب ایثار کے ساتھ اپنی پوری زندگی قوم کے غریب، محروم اور کمزور طبقات کو بااختیار بنانے کے لیے وقف کر دی۔ ان کا فلسفہ آج بھی سماجی انصاف اور ہمہ گیر ترقی کے لیے مشعلِ راہ ہے۔وزیر اعظم نریندر مودی نے سوشل میڈیا پلیٹ فارم ایکس پر اپنے پیغام میں لکھا’’سروَسو سمَرپن اْس شعور کی عکاسی ہے جس میں قوم اور انسانیت سب سے مقدم ہوتی ہے۔ انتودیہ کے بانی پنڈت دین دیال اْپادھیائے جی نے بھی اسی جذبے کے ساتھ ملک کے ہر فرد کو مضبوط بنانے کے لیے اپنی زندگی وقف کر دی۔‘‘اسی دن وزیر اعظم نے ایک اور اہم اقدام کے تحت ایک مضمون بھی شیئر کیا، جس میں بتایا گیا ہے کہ کاربن کیپچر ٹیکنالوجی کس طرح بھارت کے آئندہ اسٹیل انقلاب کو تقویت فراہم کر سکتی ہے۔ یہ مضمون مرکزی وزیر جناب ایچ ڈی کمارا سوامی نے تحریر کیا ہے۔وزیر اعظم نے کہا کہ مضمون میں واضح کیا گیا ہے کہ نیٹ زیرو 2070 کے عزم، حکمتِ عملی پر مبنی سرمایہ کاری، ہائیڈروجن اقدامات اور جدید صنعتی اصلاحات نہ صرف بھارت کی ترقی کو نئی رفتار دیں گی بلکہ عالمی سطح پر اس کی مسابقتی حیثیت کو بھی مضبوط بنائیں گی اور ایک وکست بھارت کی تعمیر میں قائدانہ کردار ادا کریں گی۔مرکزی وزیر ایچ ڈی کمارا سوامی کے مضمون پر ردعمل دیتے ہوئے وزیر اعظم نے ایکس پر لکھا’’کاربن کیپچر بھارت کے آئندہ اسٹیل انقلاب کو توانائی فراہم کر سکتا ہے۔ نیٹ زیرو 2070 کے عزم، حکمتِ عملی پر مبنی سرمایہ کاری، ہائیڈروجن اقدامات اور دیگر متعدد اقدامات ترقی اور عالمی مسابقت کو بڑھائیں گے اور ایک وکست بھارت کی جانب قائدانہ رول ادا کریں گے۔ مزید معلومات کے لیے مضمون ضرور پڑھیں۔‘‘ماہرین کے مطابق وزیر اعظم کے یہ دونوں پیغامات اس حقیقت کی طرف اشارہ کرتے ہیں کہ بھارت اپنی ترقی کی راہ میں نہ صرف اخلاقی اور فکری اقدار کو مرکزی حیثیت دے رہا ہے بلکہ جدید ٹیکنالوجی اور ماحولیاتی ذمہ داری کو بھی صنعتی پالیسی کا لازمی جزو بنا رہا ہے۔ قوم پرستی، انسانیت، پائیدار ترقی اور جدید صنعت — یہ تمام عناصر وزیر اعظم کے وڑن میں ایک دوسرے سے جڑے ہوئے دکھائی دیتے ہیں۔
