سردیوں میں برقی آلات اور ہیٹنگ سسٹم کے محتاط استعمال پر زور
سرینگر // وی او آئی//حکام نے جمعہ کے روز عوام کے لیے ایک جامع حفاظتی ہدایت نامہ جاری کرتے ہوئے کہا ہے کہ سردیوں کے دوران آگ لگنے کے واقعات میں نمایاں اضافہ ہوتا ہے، اس لیے برقی اور ہیٹنگ آلات کے استعمال میں سخت احتیاط برتی جائے۔ حکام کے مطابق سرد موسم میں ہیٹنگ آلات، ایکسٹینشن کورڈز اور بھاری لوڈ مشینوں کے استعمال میں اضافہ گھروں کو شارٹ سرکٹ اور حادثاتی آگ کے خطرات سے دوچار کر دیتا ہے۔ ہدایت نامے میں عوام سے کہا گیا ہے کہ شدید سردی سے قبل برقی تاروں، سوئچوں اور ساکٹوں کا معائنہ لازمی کیا جائے۔ حکام نے زور دیا کہ پرانے یا خراب تاریں، ڈھیلے کنکشن اور بوسیدہ وائرنگ بڑے خطرے کا باعث ہیں، جنہیں فوری طور پر ماہر الیکٹریشن سے درست یا تبدیل کرایا جائے۔ ہیٹنگ آلات کے غلط استعمال سے بھی خبردار کیا گیا ہے، جیسے ہیٹر کو پردوں، بستر یا دیگر آتش گیر اشیاء کے قریب رکھنا۔ عوام کو ہدایت دی گئی ہے کہ ہیٹر یا برقی کمبل کو کبھی بھی رات بھر یا بغیر نگرانی کے نہ چھوڑا جائے۔ اسی طرح گیزر اور روم ہیٹر جیسے بھاری آلات کے لیے ایکسٹینشن کورڈ کے استعمال سے بھی منع کیا گیا ہے کیونکہ اس سے اوورلوڈنگ کا خطرہ بڑھ جاتا ہے۔ مزید ہدایات میں کہا گیا ہے کہ مناسب ریٹنگ والے فیوز اور سرکٹ بریکرز کا استعمال لازمی ہے تاکہ اوور ہیٹنگ سے بچا جا سکے۔ رہائشیوں کو مشورہ دیا گیا ہے کہ آلات کو استعمال نہ ہونے کی صورت میں، خاص طور پر بجلی کٹنے کے دوران، پلگ نکال دیا جائے۔ گیزر کے لیے خودکار تھرمو اسٹیٹ اور کٹ آف سوئچ کی موجودگی یقینی بنانے اور برقی آلات کو گیلی حالت میں ہاتھ نہ لگانے کی تاکید کی گئی ہے۔ تیاری کے طور پر گھروں میں خشک پاؤڈر فائر ایکسٹینگوشرز آسانی سے دستیاب جگہوں پر رکھنے اور اہلِ خانہ کو ہنگامی بجلی منقطع کرنے کے طریقے سے آگاہ کرنے کی ہدایت دی گئی ہے۔ حکام نے یاد دہانی کرائی کہ برقی آگ کو کبھی بھی پانی سے بجھانے کی کوشش نہ کی جائے بلکہ فوراً بجلی کی سپلائی بند کی جائے۔ مزید کہا گیا ہے کہ ہیٹر کے اردگرد مناسب فاصلہ رکھا جائے اور کاغذ، ایندھن یا کپڑے جیسی آتش گیر اشیاء کو دور رکھا جائے۔ حکام کے مطابق آلات کے ذمہ دارانہ استعمال اور کسی بھی قسم کی چنگاری، بو یا روشنی کے جھپکنے کی علامات پر بروقت توجہ دینے سے بڑے حادثات سے بچا جا سکتا ہے۔ عوام کو مشورہ دیا گیا ہے کہ کسی بھی آگ سے متعلق واقعے کی صورت میں فوری طور پر فائر اینڈ ایمرجنسی سروسز کے ٹول فری نمبر 101 یا ضلعی کنٹرول روم سے رابطہ کریں۔
