شہر آفاق گلمرگ ،بانڈی پورہ اور کپواڑہ میں ٹریکنگ پر پابندی عائد
سرینگر/ سی این آئی // موجودہ موسمی حالات اور حفاظتی اقدامات کے بطور حکام نے شہرہ آفاق گلمرگ ،بارہمولہ، بانڈی پورہ اور کپواڑہ میں ٹریکنگ پر پابندی ہے۔سی این آئی کے مطابق اسسٹنٹ ڈائریکٹر ٹورازم گلمرگ کی جانب سے ایڈوائزری جاری کی ہے جس میں اس کے دائرہ اختیار میں آنے والے علاقوں بشمول بارہمولہ، بانڈی پورہ اور کپواڑہ کے اضلاع میں مجاز اتھارٹی کی پیشگی اجازت کے بغیر تمام ٹریکنگ سرگرمیوں پر پابندی عائد کی گئی ہے۔موجودہ موسمی حالات اور حفاظتی خدشات کے پیش نظر جاری ہونے والے حکم نامے میں یہ واضح کیا گیا ہے کہ نچلے علاقوں میں مختصر سفر بھی اس وقت تک نہیں کیا جانا چاہیے جب تک کہ باضابطہ اجازت نہ ہو۔ عہدیداروں نے کہا کہ اس اقدام کو عوامی تحفظ کے مفاد میں سختی سے نافذ کیا گیا ہے۔ایڈوائزری میں خبردار کیا گیا ہے کہ حکم کی کسی بھی خلاف ورزی کا واحد خطرہ اور ذمہ داری متعلقہ فرد پر ہوگی۔ایڈوائزری کی کاپیاں بارہمولہ، بانڈی پورہ، اور کپواڑہ کے ڈپٹی کمشنروں اور ایس ایس پیز کے ساتھ ساتھ ڈائریکٹر ٹورازم کشمیر، جوائنٹ ڈائریکٹر ٹورازم کشمیر اور جوائنٹ ڈائریکٹر انفارمیشن کشمیر کو وسیع پیمانے پر تشہیر کیلئے بھیجی گئی ہیں۔اسسٹنٹ ڈائریکٹر ٹورازم، گلمرگ کے دستخط کردہ، نوٹس میں اس بات پر زور دیا گیا ہے کہ غیر مستحکم موسم کے دوران خطرناک خطوں میں حادثات کو روکنے کے لیے احتیاطی اقدام کے طور پر پابندیاں لاگو کی جا رہی ہیں۔
