بی ایس ایف کیمپ کیلئے زرخیز زمین کی الاٹمنٹ پر نظرِ ثانی کا مطالبہ
سرینگر: پیپلز ڈیموکریٹک پارٹی کی صدر اور سابق وزیر اعلیٰ محبوبہ مفتی نے جمعرات کو وزیر اعلیٰ جموں و کشمیر عمر عبداللہ سے پلوامہ ضلع میں بی ایس ایف کیمپ کے قیام کے لیے زرخیز زرعی زمین الاٹ کرنے کے فیصلے پر ازسرِ نو غور کرنے کی اپیل کی ہے۔پلوامہ کے پژھل گاؤں کے دورے کے بعد نامہ نگاروں سے بات کرتے ہوئے محبوبہ مفتی نے کہا کہ مجوزہ زمین نہایت زرخیز ہے اور گاؤں کے عین وسط میں واقع ہے، جس پر مقامی لوگوں کی روزی روٹی کا دارومدار ہے۔ انہوں نے کہا کہ ایسی زمین کو سیکورٹی کیمپ کے لیے دینا مناسب نہیں اور بی ایس ایف کو غیر زرخیز زمین فراہم کی جانی چاہیے۔اس موقع پر پی ڈی پی کے پلوامہ سے رکن اسمبلی وحید پرہ بھی ان کے ہمراہ تھے۔ محبوبہ مفتی نے کہا کہ عمر عبداللہ وزیر اعلیٰ ہیں اور انہیں عوامی مفادات کے تحفظ کے لیے مداخلت کرنی چاہیے۔ انہوں نے مزید کہا کہ وہ اس معاملے کو وزیر دفاع کے ساتھ بھی اٹھائیں گی۔پی ڈی پی صدر نے دعویٰ کیا کہ ان کی جماعت نے حال ہی میں اسمبلی میں ایک بل پیش کیا تھا جس کا مقصد ان زمینوں کا تحفظ تھا، تاہم عمر عبداللہ نے اس بل کو زمین قبضہ کرنے والوں کے حق میں قرار دیا۔ محبوبہ مفتی کے مطابق اس بل کے مسترد ہونے کے بعد انہدامی کارروائیوں میں تیزی آئی ہے، جس کے باعث عوام میں خوف اور عدم تحفظ کا احساس بڑھ گیا ہے۔
