بازاروں اور دکانداروں کے مفادات کا تحفظ اولین ترجیح/جے ٹی اے
سرینگر//جوائنٹ ٹریڈرز ایسوسی ایشن (جے ٹی اے) جو کہ 14 سٹی سینٹر بازاروں کی نمائندگی کرتی ہے،نے ایک بیان میں ایک دن کی مارکیٹ بند کرنے کے فیصلے سے متعلق حالیہ بات چیت کے بارے میں اپنی پوزیشن واضح کی ہے۔ ٹی ای این کو بھیجے گئے اپنے بیان میں جوائنٹ ٹریڈرس ایسوسی ایشن نے کہاہے کہ ’’یہ بات ہمارے علم میں آئی ہے کہ بعض افراد، جنہوں نے پہلے بھی تجارتی برادری کو کافی نقصان پہنچایا ہے، بغیر کسی مینڈیٹ یا اختیار کے بازاروں کی جانب سے بات کرنے کی کوشش کر رہے ہیں۔ ہم یہ واضح کرنا چاہتے ہیں کہ یہ افراد ہمارے دکانداروں کی آواز کی نمائندگی نہیں کرتے۔ہر مارکیٹ کا سربراہ اپنی مارکیٹ کی منفرد حرکیات کو سمجھتا ہے۔ مثال کے طور پر، سینٹرل لال چوک، سیاحوں کی سرگرمیوں کا مرکز ہونے کی وجہ سے اتوار کو کاروبار کیلئے ایک بہترین دن لگتا ہے۔ ہم نے ہمیشہ اس بات پر یقین رکھا ہے کہ اس طرح کے فیصلے ہر مارکیٹ کی مخصوص ضروریات اور حالات کو مدنظر رکھ کر کیے جانے چاہئیں۔جے ٹی اے نے کمشنر کے ساتھ اپنی حالیہ میٹنگ میں، کسی بھی بندش کے حکم کے نفاذ سے پہلے 10 دن کی مدت کی درخواست کی تاکہ مارکیٹ کے مختلف سربراہوں کے ساتھ مکمل بات چیت کی اجازت دی جا سکے۔ جب کہ ہمیں پہلے ہی 14 سٹی سینٹر مارکیٹوں سے مینڈیٹ مل چکا ہے، ہم اس بات کو یقینی بنانا چاہتے تھے کہ تاجر برادری کے دیگر افراد سے بھی مشاورت کی جائے اور ان کی آواز سنی جائے۔ہمارے معاملات میں مداخلت کرنے کی کوشش کرنے والوں سے ہم پرزور اپیل کرتے ہیں کہ وہ ایسا کرنے سے باز رہیں۔ یہ افراد اپنی گمراہ کن پالیسیوں اور اقدامات سے پہلے ہی دکانداروں کے امیج اور فلاح و بہبود کو نقصان پہنچا چکے ہیں۔ اس طرح کی مداخلت کے اثر سے دکاندار مشکلات کا شکار ہیں اور اب وقت آگیا ہے کہ اسے روکا جائے‘‘۔بیان میں مزید کہا گیا کہ ’’جے ٹی اے دکانداروں کی عزت اور وقار کیلئے مضبوطی سے کھڑی ہے۔ ہم تاجر برادری کے مفادات کے تحفظ کیلئے ہمیشہ پرعزم رہے ہیں اور کسی کو مزید تاجروں کو بے وقوف بنانے یا گمراہ کرنے کی اجازت نہیں دیں گے۔ اب وقت آگیا ہے کہ بازاروں کے فیصلوں کا احترام کیا جائے اور جو حکام بالا ہیں انہیں دکانداروں کے حقیقی مفادات کی نمائندگی کرنے دیں‘‘۔
