عمر عبداللہ گاندربل حلقہ سے جموں و کشمیر اسمبلی کا الیکشن لڑیں گے

روح اللہ ، ناصر اسلم وانی نے میاں الطاف کی موجودگی میں اس بات کا اعلان کیا

سرینگر//جموں کشمیر کے سابق وزیر اعلیٰ اور نائب صدر نیشنل کانفرنس عمر عبداللہ نے سیاسی پینترا بدلتے ہوئے اعلان کیا کہ وہ اسمبلی انتخابات گاندربل سے لڑیں گے ۔ انہوں نے پہلے کہا تھا کہ وہ اسمبلی انتخابات میں تک تک حصہ نہیں لیں گے جب تک نہ جموں کشمیر کو ریاست کا درجہ واپس نہ دیا جائے ۔ اتوار کو پارٹی لیڈران روح اللہ مہدی اور ناصر اسلم وانی نے میاں الطاف کی موجودگی میں عمر عبداللہ کی جانب سے الیکشن میں حصہ لینے کا اعلان کیا ۔ وائس آف انڈیا کے مطابق جموں و کشمیر کے سابق وزیر اعلیٰ اور نیشنل کانفرنس کے نائب صدر عمر عبداللہ گاندربل حلقہ سے آئندہ اسمبلی انتخابات لڑیں گے۔ یہ اعلان لوک سبھا کے رکن سید روح اللہ مہدی اور این سی کے صوبائی صدر ناصر اسلم وانی نے اتوار کو عمر عبداللہ اور این سی کے سینئر لیڈر اور اننت ناگ-راجوری حلقہ کے رکن اسمبلی میاں الطاف احمد کی موجودگی میں کیا۔ عمر عبداللہ گاندربل ضلع کے نونر گاؤں آئے تھے، جہاں ایک سیاسی کارکن صائم مصطفیٰ نے پارٹی میں شمولیت اختیار کی۔صائم مصطفیٰ نے سری نگر کی سیٹ کے لیے لوک سبھا کا الیکشن لڑا تھا، جس میں سید روح اللہ مہدی نے دیگر امیدواروں کے ساتھ صائم کو شکست دی تھی۔ اتوار کو عمر عبداللہ کا اسمبلی انتخابات میں حصہ لینے کا اعلان ان کے اس پہلے بیان کی تردید کرتا ہے کہ جب تک جموں و کشمیر ایک یونین ٹیریٹری رہے گا وہ انتخابات میں نہیں کھڑے ہوں گے۔ عمر عبداللہ 2009 سے 2015 تک سابقہ ریاست جموں و کشمیر کے وزیر اعلیٰ رہے اور اپنی پارٹی کے صدر بھی رہے۔ وہ تین بار لوک سبھا کے رکن رہے ہیں اور گاندربل (2008–2014) اور بیرواہ (2014–2019) اسمبلی حلقوں کی نمائندگی کر چکے ہیں۔ وہ 2002 کے اسمبلی انتخابات میں گاندربل سے پیپلز ڈیموکریٹک پارٹی کے قاضی محمد افضل سے ہار گئے۔الیکشن کمیشن آف انڈیا (ای سی آئی) نے جموں و کشمیر میں تین مرحلوں میں ہونے والے اسمبلی انتخابات کے پہلے مرحلے کے لیے پہلے ہی نوٹس جاری کر دیا ہے۔ پہلے مرحلے میں وادی اور جموں ڈویڑن میں پھیلے 24 اسمبلی حلقوں میں 18 ستمبر کو ووٹنگ ہوگی۔ دوسرے مرحلے کے لیے 25 ستمبر اور آخری مرحلے کے لیے یکم اکتوبر کو ووٹ ڈالے جائیں گے۔ ووٹوں کی گنتی 4 اکتوبر کو ہوگی اور ووٹنگ کا پورا عمل 6 اکتوبر تک مکمل ہو جائے گا۔ جموں و کشمیر میں جون 2018 کے بعد سے کوئی منتخب حکومت نہیں ہے، جب بی جے پی نے محبوبہ مفتی کی قیادت والی PDP-BJP مخلوط حکومت سے حمایت واپس لے لی تھی۔ ریاست گورنر راج کے تحت آئی اور اس وقت کے گورنر ستیہ پال ملک نے اسمبلی تحلیل کر دی۔ 5 اگست 2019 کو آرٹیکل 370 کو منسوخ کر دیا گیا اور جموں و کشمیر کو دو مرکز کے زیر انتظام علاقوں جموں و کشمیر اور لداخ میں تقسیم کر دیا گیا۔