عمران ملک اور قمر انقبال فہرست سے باہر، انتخاب پر بحث تیز
سرینگر/یو این ایس/ جموں و کشمیر کرکٹ سے وابستہ حلقوں میں اس وقت بحث کا آغاز ہو گیا ہے جب تیز گیند باز عمران ملک اور تجربہ کار بلے باز قمر ااقبال کو رنجی ٹرافی کے دوسرے مرحلے سے قبل پونڈیچیری میں منعقد ہونے والے تیاری کیمپ کے لیے اعلان کردہ اسکواڈ میں شامل نہیں کیا گیا۔یو این ایس کے مطابق عمران ملک، جو حالیہ برسوں میں جموں و کشمیر کے سب سے نمایاں کرکٹرز میں شمار کیے جاتے ہیں اور بھارت کے لیے 10 ون ڈے اور 8 ٹی ٹوئنٹی میچ کھیل چکے ہیں، رنجی ٹرافی کے ابتدائی مرحلے میں جموں و کشمیر ٹیم کا حصہ تھے۔ تاہم وہ اس سیزن میں صرف ایک میچ — راجستھان کے خلاف سرینگر میں — کھیل سکے، جہاں وہ کوئی وکٹ حاصل نہ کر سکے۔ اس سیزن میں ان کی کارکردگی غیر مستحکم رہی؛ سید مشتاق علی ٹرافی میں پانچ میچوں میں چھ وکٹیں لینے کے باوجود انہیں بعد ازاں وجے ہزارے ٹرافی اسکواڈ سے بھی باہر رکھا گیا تھا۔اسی طرح، تجربہ کار اوپنر قمر انقبال کو بھی تیاری کیمپ کے لیے نظرانداز کیا گیا ہے، حالانکہ انہوں نے اسی سیزن میں دہلی کے خلاف ارون جیٹلی اسٹیڈیم میں شاندار سنچری اسکور کر کے جموں و کشمیر کو ایک تاریخی فتح دلانے میں کلیدی کردار ادا کیا تھا، جو حالیہ برسوں میں ٹیم کی یادگار کامیابیوں میں شمار کی جاتی ہے۔اس کے برعکس، جموں و کشمیر کرکٹ ایسوسی ایشن نے چند پرانے اور آزمودہ کھلاڑیوں کو دوبارہ اسکواڈ میں شامل کیا ہے۔ دکشنٹ کنڈل اور کوالپریت سنگھ کی واپسی ہوئی ہے، جبکہ عمر نذیر اور شبھم پنڈیر کو بھی دوبارہ موقع دیا گیا ہے، جس سے یہ عندیہ ملتا ہے کہ ٹیم مینجمنٹ آنے والے اہم مقابلوں سے قبل ٹیم کے توازن پر نظرِ ثانی کر رہی ہے۔جموں و کشمیر ٹیم اپنی رنجی ٹرافی مہم کا دوبارہ آغاز 22 سے 25 جنوری تک سکھم اسٹیڈیم پونڈیچیری میں گروپ ڈی کے مقابلے میں میزبان ٹیم کے خلاف کرے گی۔ ٹیم کے ہیڈ کوچ اجے شرما 17 جنوری کو اسکواڈ کے ساتھ شامل ہوں گے، جبکہ ٹیم پہلے ہی جنوبی ہند میں رپورٹ کرے گی۔اس کے بعد جموں و کشمیر کو 29 جنوری سے یکم فروری تک ہماچل پردیش کے خلاف نداون کے اٹل بہاری واجپئی کرکٹ اسٹیڈیم میں مقابلہ کرنا ہے۔ رنجی ٹرافی کے ناک آؤٹ مرحلے کا آغاز 6 فروری سے ہوگا جو 28 فروری تک جاری رہے گا۔یو این ایس کے مطابق فی الوقت جموں و کشمیر ایلیٹ گروپ ڈی میں پانچ میچوں سے حاصل کردہ 20 پوائنٹس کے ساتھ دوسرے نمبر پر ہے، جبکہ ممبئی سرفہرست ہے۔ ناک آؤٹ مرحلے تک رسائی کے لیے آئندہ مقابلے ٹیم کے لیے نہایت اہم سمجھے جا رہے ہیں۔ پونڈیچیری میں تیاری کیمپ کے انعقاد کے فیصلے پر وضاحت کرتے ہوئے جموں کشمیر کرکٹ ایسو سی ایشن نے کہا کہ اس کا مقصد ٹیم کو حالات سے ہم آہنگ کرنا اور بہتر تیاری کو یقینی بنانا ہے۔ ایسوسی ایشن کے مطابق کھلاڑی اور معاون عملہ 16 جنوری 2026 کو اپنی اپنی جگہوں سے براہِ راست چنئی پہنچیں گے، جہاں سے پونڈیچیری کا سفر بس کے ذریعے کرکٹ ایسوسی ایشن آف پونڈیچیری کے انتظامات کے تحت ہوگا۔اہم ناموں کی غیر موجودگی اور چند کھلاڑیوں کی واپسی کے باعث یہ تیاری کیمپ رنجی ٹرافی کے فیصلہ کن مرحلے سے قبل جموں و کشمیر کی ممکنہ ٹیم کمبی نیشن کے حوالے سے اہم اشارے دے سکتا ہے۔
