جموں میں بین الاقوامی یومِ خواتین کی تقریبات سے خطاب
جموں//وزیر برائے تعلیم ، سماجی بہبود ، صحت و طبی تعلیم محترمہ سکینہ ایتو نے آج کہا کہ خواتین تمام شعبوں میں تبدیلی لانے والا کردار ادا کر رہی ہیں اور معاشرے کی تشکیل میں ان کا حصہ قابلِ ذکر ہے ۔ وزیر نے یہ باتیں جموں کے ابھینو تھیٹر میں مشن شکتی کی جانب سے جے اینڈ کے اکیڈمی آف آرٹ ، کلچر اینڈ لینگویجز ( جے کے اے اے سی ایل ) کے اشتراک سے منعقدہ بین الاقوامی یومِ خواتین کی شاندار تقریبات سے خطاب کرتے ہوئے کہیں ۔ یہ تقریبات تھیم ’ Give to Gain ‘ کے تحت منعقدکی گئی تھیں ۔ کامیاب خواتین ، افسران ، طلبہ اور سماجی کارکنوں کی بڑی تعداد کو مخاطب کرتے ہوئے وزیر نے کہا کہ آج خواتین تعلیم ، صحت ، انتظامیہ ، کاروباری شعبہ، سائنس ، کھیل اور سماجی ترقی سمیت تمام شعبوں میں تبدیلی لانے والا کردار ادا کر رہی ہیں اور یہ دن ان کی متنوع شعبوں میں کامیابیوں اور پہچان کو منانے کیلئے منایا جاتا ہے ۔ محترمہ سکینہ ایتو نے کہا ’’ خواتین نہ صرف اپنے خاندانوں کی ریڑھ کی ہڈی ہیں بلکہ معاشرے کی ترقی کی محرک قوت بھی ہیں ۔ ان کی لچک ، عزم اور قیادت ہمارے ملک کیلئے ایک مضبوط اور زیادہ جامع مستقبل کی تشکیل کر رہی ہے ۔ ‘‘ وزیر نے دوبارہ تصدیق کی کہ حکومت خواتین اور لڑکیوں کیلئے مساوی مواقع ، وقار اور تحفظ کو یقینی بنانے کیلئے پرعزم ہے ۔ انہوں نے نوٹ کیا کہ حکومت کی جانب سے خواتین کو بااختیار بنانے اور خود انحصار بنانے کیلئے متعدد اقدامات نافذ کئے جا رہے ہیں ۔ انہوں نے زور دیا کہ تعلیم خواتین کو بااختیار بنانے اور انہیں اپنی مکمل صلاحیتوں کا ادراک کرنے کا سب سے طاقتور ہتھیار ہے ۔ انہوں نے نوجوان لڑکیوں سے اپنے عزائم کے ساتھ اعتماد کے ساتھ آگے بڑھنے کی اپیل کی اور خاندانوں سے اپنی بیٹیوں کی خواہشات کی حمایت کرنے کی ترغیب دی ۔ انہوں نے کہا ’’ ایک تعلیم یافتہ اور بااختیار عورت نہ صرف اپنے خاندان بلکہ پوری کمیونٹی کو بھی بلند کرتی ہے ۔ جب خواتین ترقی کرتی ہیں تو قوم ترقی کرتی ہے ۔ ‘‘ مرکزی وزیر خزانہ محترمہ نرملا سیتا رمن کا حوالہ دیتے ہوئے وزیر نے کہا کہ مرکزی حکومت کے ایک اہم اور کلیدی وزارت کی قیادت کرنا یہ ثبوت ہے کہ خواتین ہر شعبے میں قیادت کر سکتی ہیں ۔ انہوں نے نوجوان طالبات سے اپیل کی کہ وہ نرملا سیتا رمن جیسی خواتین کو اپنا رول ماڈل بنائیں اور یہ ثابت کریں کہ عزم اور محنت کسی بھی رکاوٹ کو عبور کر سکتی ہے ۔ بین الاقوامی یومِ خواتین کے موقع پر شرکاء اور خواتین کو مبارکباد پیش کرتے ہوئے وزیر نے حکومت کے عزم کا اعادہ کیا کہ وہ ایسی پالیسیاں اور پروگرام مضبوط کریں گی جو خواتین کی بااختیاری ، حفاظت اور سماجی و معاشی ترقی کو یقینی بنائیں ۔ اپنے خیر مقدم کے خطاب میں مشن ڈائریکٹر مشن وتسلیہ/مشن شکتی ناظم زئی خان نے کہا کہ یہ خصوصی دن جموں و کشمیر اور پوری دنیا بھر میں خواتین اور لڑکیوں کی موجودگی ، کامیابی اور لچک کو منانے کیلئے منایا جاتا ہے ۔ جے کے اے اے سی ایل کی سیکرٹری ہروندر کور نے ووٹ آف تھینکس پیش کرتے ہوئے اس دن کی خواتین کیلئے اہمیت پر بات کی ۔ بعد میں نمایاں عوامی خدمات کی پہچان میں وزیر نے جنگلات ، ماحولیات کی کمشنر سیکرٹری شیتل نندا کو تہنیت پیش کی ۔ اس موقع پر جموں کی کلسٹر یونیورسٹی کے طلبہ نے ’’ بیٹی بچاؤ بیٹی پڑھاؤ ‘‘ کے تھیم پر ایک فکر انگیز سکیٹ پیش کی جس نے لڑکیوں کی تعلیم اور بااختیاری کی اہمیت کو موثر طریقے سے اجاگر کیا ۔ اس موقع پر پرنسپل سیکرٹری کلچر ، کمشنر سیکرٹری جنگلات و ماحولیات ، ایم ڈی وومن ڈیولپمنٹ کارپوریشن ، سوشل ویلفئیر ڈیپارٹمنٹ کے سینئر افسران ، کامیاب خواتین ، سماجی کارکن اور طلبہ کی بڑی تعداد بھی موجود تھی ۔
