کشمیر کے سرکردہ لوک فنکار غلام نبی شاہ( بلبل )کا اِنتقال ،وادی بھر میں رنج و غم کی لہر
سری نگر//کشمیر کے معروف موسیقار اور محکمہ اطلاعات و تعلقات عامہ جموں و کشمیر کے سینئر تجربہ کار اُستاد غلام نبی شاہ (بُلبُل) المعروف ’’حملِ بُلبُل ‘‘ آج اَپنے آبائی علاقے ڈنگی وچہ رفیع آباد (بارہمولہ) میں اِنتقال کر گئے۔اُستاد غلام نبی شاہ جو ’حمالِ بُلبُل‘ کے نام سے مشہور ہیں، نے ڈنگی وچہ میں ایک ثقافتی تقریب میں دِلکش پرفارمنس کے بعد اُس وقت کے وزیر اعظم سے یہ خطاب حاصل کیا۔’’حمل‘‘ اس علاقے کا پرانا نام تھا جسے بعد میں معروف مجاہد آزادی رفیع احمد قِدوائی کے اعزاز میں رفیع آباد کا نام رَکھ دیا گیا۔بُلبُل نے اَپنی زِندگی کشمیری فن و ثقافت کے فروغ دینے کے لئے وقف کر دی۔ اُنہوں نے محکمہ اطلاعات میں مختلف حیثیتوں سے خدمات انجام دیں اور کشمیری لوک موسیقی کو قومی و بین الاقوامی سطح پر اُجاگر کیا۔ اُنہوں نے اَپنی فنکاری کے ذریعے نہ صرف خود بلکہ محکمہ کو بھی کئی اعزازات دِلوائے اور دوسروں کے لئے مشعلِ راہ بنے۔اُنہوں نے کئی دہائیوں تک اَپنی روح پرور آواز ،سارنگی پر مہارت اور مشہور ’فول گلاس‘ رقص سے سامعین کو مسحور کیا جس میں وہ اَپنے سر پر پانی کا بھرا ہوا گلاس رکھ کر نہایت مہارت سے رقص کرتے تھے جو ان کی فن سے وابستگی اور مہارت کا مظہر تھا۔ وہ صرف فنکار ہی نہیں بلکہ ایک باوقار اورحلیم الطبع ، ہردلعزیز ،شریف النفس ،نیک اِنسان شخصیت کے مالک تھے جودوسروں کے لئے باعثِ عزت و محبت بنے۔وہ کشمیری روایتی لوک رقص بچہ نغمہ میں بھی مہارت رکھتے تھے جس میں کم عمر لڑکے خواتین کے لباس میں ملبوس مخصوص رقص اور گھومتے ہوئے انداز میں کشمیری لوک گیت گاتے ہیں۔سال 2011 ء میں انہیں ’’ شیرِ کشمیر شیخ محمد عبداللہ ایوارڈ ‘‘سے نوازا گیا جو کشمیری لوک موسیقی کے فروغ میں ان کی خدمات کا اعتراف تھا۔ یہ اعزاز ان کی روایات کو زندہ رکھنے کے عزم کا مظہر تھا۔دریں اثنا، اِس سلسلے میں ایک تعزیتی میٹنگ آج جوائنٹ ڈائریکٹر اِنفارمیشن کشمیر سیّد شاہنوار بخاری کی صدارت میں منعقد ہوئی جس میں ڈپٹی ڈائریکٹر اِنفارمیشن (پی آر ) احسان الحق چشتی ، کلچر آفیسر کشمیر برہان حسین ،دیگر اَفسران اور ملازمین بھی موجود تھے۔میٹنگ میں مرحوم کی محکمہ کے تئیں خدمات کو شاندار خراجِ تحسین پیش کیا گیا اور مرحوم کی روح کے ابدی سکون کے لئے دعا کی گئی۔ جوائنٹ ڈائریکٹر اِنفارمیشن کشمیر نے کہا،’’ہمارے دل دُکھی ہیں کہ غلام نبی بُلبُل اَب ہم میں نہیں رہے۔ ہم ان کے اہلِ خانہ، دوستوں اور چاہنے والوں سے دِلی اِظہارِ تعزیت کرتے ہیں۔‘‘ڈپٹی ڈائریکٹر ِاِنفارمیشن (پی آر) نے بھی مرحوم کے اِنتقال پر گہرے دُکھ کا اظہار کرتے ہوئے کہا کہ اُن کا اِنتقال کشمیر کی لوک موسیقی کے لئے ایک بہت بڑا نقصان قرار دیا۔اُنہوں نے کہا کہ بُلبُل ایک ایسی وراثت چھوڑ گئے ہیں جو ہمیشہ یاد رکھی جائے گی۔محکمہ اطلاعات کشمیر ڈویژن کے تمام افسران و ملازمین نے بھی بلبل کے اِنتقال پر گہرے دُکھ کا اِظہار کیا ہے ۔اُنہوں نے مرحوم کی روح کے دائمی سکون اور سوگوار کو یہ صدمہ عظیم برداشت کرنے کی ہمت کے لئے دعا کی۔
