کرناٹک سے شروع ہوا حجاب تنازع اب دہلی تک پہنچ گیا ہے۔ جنوبی دہلی میونسپل کارپوریشن کی چیئرمین نکیتا شرما نے ایک نوٹس جاری کیا ہے جس میں کہا گیا ہے کہ صرف اسکول کے لباس میں آنے والے بچوں کو ہی اسکول میں داخلہ ملے گا۔ اسکول میں مذہبی لباس میں داخلہ نہیں دیا جائے گا۔ جاری کردہ نوٹس میں کہا گیا ہے کہ دیکھا گیا ہے کہ بہت سے والدین اپنے بچوں کو مذہبی لباس میں اسکول بھیج رہے ہیں۔ یہ ٹھیک نہیں ہے نوٹس میں مزید کہا گیا ہے کہ بچے یونیفارم میں بہت خوبصورت لگ رہے ہیں اور جنوبی دہلی میونسپل کارپوریشن وقتاً فوقتاً یونیفارم کا رنگ تبدیل کرتی رہتی ہے۔ سکولوں میں یونیفارم کا نفاذ کیا جاتا ہے تاکہ بچوں میں امیر اور غریب ایک دوسرے کے بارے میں احساس کمتری پیدا نہ ہو۔ ایک ہی یونیفارم پہننا ضروری ہے تاکہ بچوں میں عدم مساوات کا احساس نہ ہو قابل ذکر بات یہ ہے کہ حجاب کا تنازع کرناٹک کے کالج سے شروع ہوا اور پورے ملک میں پھیل گیا۔ معاملہ ہائی کورٹ تک پہنچ گیا ہے۔ اس حوالے سے سماعت بھی جاری ہے۔ کرناٹک ہائی کورٹ نے جمعہ کو کیس سے متعلق تمام درخواستوں پر سماعت مکمل کی۔ اس کے ساتھ ہی ہائی کورٹ کے فل بنچ نے اپنا فیصلہ محفوظ کر لیا ہے۔
