دہشت گردوں کے چیلنج سے نمٹنے کیلئے متحدہ عالمی اقدام کی ضرورت :انتونیو گوتریس
سری نگر// اقوام متحدہ کے سکریٹری جنرل انتونیو گوٹیرس نے ہفتہ کو دہشت گرد گروپوں کی طرف سے تنازعات کو ہوا دینے کے لئے نئی ٹیکنالوجی کے استعمال کے چیلنج سے نمٹنے کیلئے مربوط عالمی کوششوں پر زور دیا۔جے کے این ایس مانٹرینگ ڈیسک کے مطابق دہلی میں اقوام متحدہ کی سلامتی کونسل کاؤنٹر ٹیررازم کمیٹی کے جاری اجلاس میں ایک پیغام میں، اقوام متحدہ کے سکریٹری جنرل انتونیو گوٹیرس نے مختلف دہشت گرد گروپوں کی جانب سے غلط معلومات پھیلانے، اختلافات کو ہوا دینے اور نوجوانوں کو بنیاد پرست بنانے کیلئے نئی ٹیکنالوجیز کے غلط استعمال پر تشویش کا اظہار کیا۔دہلی میں اقوام متحدہ کی سلامتی کونسل کی انسداد دہشت گردی کمیٹی کے اجلاس میں اقوام متحدہ کی سلامتی کونسل کے تمام 15 رکن ممالک کے نمائندے شرکت کر رہے ہیں۔ انتونیوگوٹیرس کا پیغام عالمی ادارہ کے ایک عہدیدار نے اجلاس میں پڑھ کر سنایا۔اقوام متحدہ کے سکریٹری جنرل نے کہا کہ نئی اور اُبھرتی ہوئی ٹیکنالوجیز میں ہر جگہ انسانی حالات کو بہتر بنانے کی بے مثال صلاحیت ہے، افسوس کہ ان کا غلط استعمال بھی بہت سے لوگوں نے کیا جن میں بدنیتی پر مبنی عناصر بھی شامل ہیں۔انہوں نے کہا کہ دہشت گرد اور نفرت انگیز نظریات پیش کرنے والے دیگر نئی اور ابھرتی ہوئی ٹیکنالوجی کو غلط معلومات پھیلانے، اختلاف کو ہوا دینے،دہشت گردوںکی بھرتی ،بنیاد پرستی کوپھیلانے اور وسائل کو متحرک کرنے اور حملوں کو انجام دینے کے لئے استعمال کر رہے ہیں۔ اقوام متحدہ کے سکریٹری جنرل انتونیو گوٹیرس نے کہا کہ کووڈ19 وبائی مرض نے اس طرح کے غلط استعمال کے بہت سے خطرات کو اجاگر کیا ہے۔انہوں نے کہا کہ ہمیں ڈیجیٹل میدان میں تمام انسانی حقوق کے تحفظ کا عہد کرتے ہوئے ان خطرات کو کم کرنے کے لئے ٹھوس اقدامات کو اپنانا چاہیے۔موصوف سکریٹری جنرل انتونیو گوٹیرس نے مزید کہا کہ یہ صرف موثر کثیرالجہتی اور بین الاقوامی تعاون جو اقوام متحدہ کے چارٹر کی اقدار اور ذمہ داریوں اور انسانی حقوق کے عالمی اعلامیے میں ہمارے ردعمل کو لنگر انداز کرتے ہوئے حاصل کیا جا سکتا ہے۔
