والدین نجی اداروں سے بچوں کو سرکاری اسکولوں میں منتقل کر رہے ہیں، عوامی اعتماد کی بحالی
سرینگر//وی او آئی//ڈائریکٹر اسکول ایجوکیشن کشمیر نصیر احمد وانی نے کہا ہے کہ یہ حوصلہ افزا بات ہے کہ والدین اپنے بچوں کو نجی اداروں سے نکال کر سرکاری اسکولوں میں داخل کر رہے ہیں، جو عوامی تعلیم پر نئے اعتماد کی علامت ہے۔ وانی نے بڈگام ضلع کے مختلف اسکولوں کے دورے کے دوران کہا کہ بڑھتی ہوئی داخلہ شرح اس بات کی عکاسی کرتی ہے کہ عوام کو سرکاری اداروں میں فراہم کی جانے والی تعلیم اور انفراسٹرکچر پر اعتماد بڑھ رہا ہے۔ انہوں نے کہاکہ یہ دیکھ کر انتہائی اطمینان ہوتا ہے کہ درجنوں والدین اپنے بچوں کو نجی اسکولوں سے سرکاری اسکولوں میں لا رہے ہیں۔ اس سے ظاہر ہوتا ہے کہ لوگ یہاں کے تعلیمی معیار اور سہولیات پر بھروسہ کرنے لگے ہیں۔” انہوں نے والدین کو یقین دلایا کہ محکمہ ان کی توقعات پر پورا اترنے کے لیے کام کرے گا اور اساتذہ سے اپیل کی کہ وہ معیاری تعلیم فراہم کرنے کی اپنی ذمہ داری پوری کریں۔ وانی نے کہا کہ داخلوں میں اضافہ اس وقت سامنے آیا ہے جب محکمہ تعلیم سرکاری اسکولوں میں انفراسٹرکچر کی بہتری، تدریسی معیار میں اضافہ اور مانیٹرنگ نظام کو مضبوط بنانے کے اقدامات کر رہا ہے۔ یہ پیش رفت سرکاری تعلیم کے لیے ایک حوصلہ افزا موڑ سمجھی جا رہی ہے، جو عوامی اعتماد کی بحالی اور تعلیمی نظام کی مضبوطی کی طرف اشارہ کرتی ہے۔
