بارڈر-گواسکر ٹرافی میں ہندوستان اور آسٹریلیا کے درمیان برسبین کے گابا میں کھیلا جا رہا تیسرا ٹیسٹ میچ آج ڈرا ہو گیا۔ اس کے ساتھ ہی ورلڈ ٹیسٹ چمپئن شپ (ڈبلیو ٹی سی) ایک دلچسپ مرحلہ میں شامل ہوتا دکھائی دے رہا ہے۔ ہندوستانی ٹیم کے لیے آسٹریلیا کے خلاف ہونے والے آئندہ 2 ٹیسٹ میچ انتہائی اہم ثابت ہونے والے ہیں، کیونکہ اس کے فائنل میں پہنچنے کی راہ بہت حد تک ان 2 ٹیسٹ میچوں پر ہی منحصر ہے۔ ہندوستان کے لیے آگے کی راہ بہت آسان دکھائی نہیں دے رہی، لیکن ایسا بھی نہیں ہے کہ راستہ بند ہو چکا ہے۔
ڈبلیو ٹی سی کا پوائنٹس ٹیبل دیکھیں تو اس وقت جنوبی فریقہ 63.33فیصد پوائنٹس کے ساتھ پہلے مقام پر قابض ہے۔ آسٹریلیا اور ہندوستان کے پوائنٹس میں تھوڑی تبدیلی ہوئی ہے، لیکن یہ دونوں ہی دوسرے اور تیسرے مقام پر ہیں۔ آسٹریلیا 58.89 فیصد پوائنٹس کے ساتھ دوسرے اور ہندوستان 55.88فیصد پوائنٹس کے ساتھ تیسرے نمبر پر ہے۔ چوتھے نمبر پر نیوزی لینڈ کا قبضہ ہے جس کے 48.21 فیصد پوائنٹس ہیں، اور پانچواں مقام 45.45فیصد پوائنٹس کے ساتھ سری لنکا کو حاصل ہے۔ اصل مقابلہ اوپری 3 ٹیموں کے درمیان ہی ہے، ان کے علاوہ باقی ٹیمیں ڈبلیو ٹی سی فائنل کی دوڑ سے باہر ہی ہو چکی ہیں۔
جہاں تک ہندوستانی ٹیم کے لیے ڈبلیو ٹی سی فائنل میں پہنچنے کے امکانات کا سوال ہے، تو ہندوستان کو یقینی ٹکٹ حاصل کرنے کے لیے آسٹریلیا کے خلاف ہونے والے آئندہ دونوں ٹیسٹ میچوں میں جیت حاصل کرنی ہوگی۔ اس سے آسٹریلیا کے پوائنٹس کافی کم ہو جائیں گے اور ہندوستان کے پوائنٹس بڑھیں گے۔ دونوں ٹیسٹ میچ اگر ہندوستان جیت جاتا ہے تو اس کے 60.52 فیصد پوائنٹس ہو جائیں گے اور آسٹریلیا کے پوائنٹس اس سے کم رہیں گے، چاہے وہ سری لنکا کے خلاف ہونے والے 2 ٹیسٹ میچوں کی سیریز میں جیت ہی حاصل کیوں نہ کر لے۔ جنوبی افریقہ پاکستان کے خلاف 2 ٹیسٹ میچوں کی سیریز کا ایک بھی میچ جیتتی ہے تو وہ فائنل میں جگہ بنا لے گی، ورنہ آسٹریلیا اور ہندوستان کے درمیان فائنل میچ ہوتا دکھائی دے رہا ہے۔ جنوبی افریقہ کی ایک فتح اسے فائنل میں پہنچا دے گی اور پھر دوسری ٹیم کا انتظار کرنا ہوگا جو ہندوستان یا آسٹریلیا ہو سکتی ہے۔
اس کے علاوہ بھی کچھ ایسے حالات ہیں کہ ہندوستانی ٹیم آسٹریلیا سے ایک ٹیسٹ میچ جیت کر بھی ڈبلیو ٹی سی کے فائنل میں پہنچ سکتی ہے۔ ہندوستانی ٹیم اگر بارڈر-گواسکر ٹرافی کے باقی بچے 2 میچوں سے اگر ایک میں جیت حاصل کرتی ہے اور ایک ڈرا کراتی ہے تو پھر اسے سری لنکا اور آسٹریلیا کے خلاف ہونے والے ٹیسٹ میچ کا نتیجہ دیکھنا ہوگا۔ اس صورت میں ہندوستانی ٹیم امید کرے گی کہ 2 ٹیسٹ میچوں کی سیریز میں آسٹریلیا سری لنکا سے شکست کھا جائے۔ اگر ایسا ہوا تو پھر ہندوستان اور جنوبی افریقہ کے درمیان فائنل مقابلہ کھیلا جائے گا۔
