رام بن// پرنسپل سیکرٹری سکل ڈیولپمنٹ ڈاکٹر اصغر سامون نے چندر کوٹ کے گورنمنٹ پولی تکنیک کالج رام بن میں جاری تعمیراتی کام کی پیش رفت کا معائینہ کیا۔ اُنہوں نے اِنڈسٹریل ٹریننگ اِنسٹی چیوٹ بانہال کا بھی دورہ کیا۔اِس موقعہ پر ضلع ترقیاتی کمشنر رام بن مسر ت الاسلام ، جوائنٹ ڈائریکٹر ٹیکنیکل ایجوکیشن جموں فاروق احمد خان، پرنسپل جی پی سی رام بن سُکت گپتا اور متعلقہ اَفسران موجود تھے۔پرنسپل سیکرٹری نے گورنمنٹ پولی تکنیک کالج رام بن کے تعمیراتی کام کا معائینہ کرنے کے بعد تعمیراتی ایجنسیوں اور کالج کے پرنسپل کو ہدایت دی کہ وہ نئی عمارت میں کلاس شروع کرنے کے لئے تعلیمی بلاک کا تعمیراتی کام ترجیحی بنیادوں پر مکمل کریں۔اُنہوں نے ادارے کے بجلی اور پانی کی فراہمی کے منصوبے کا بھی جائزہ لیا ۔ اُنہیں جانکاری دی گئی کہ اِدارے کی پانی کی ضروریات کو پور ا کرنے کے لئے کھودا ہوا کنواں تعمیر کرنے کی تجویز ہے۔اُنہوں نے کالج پرنسپل کو ہدایت دی کہ وہ طالبات اور اور طلباء دونوں کے لئے ہوسٹل اور بس سہولیت کی تجویز پیش کریں۔اُنہوںنے ضلع کے تمام تکنیکی اِداروں کے عملے کی تعداد کا بھی جائزہ لیا۔پرنسپل سیکرٹری نے داخلہ کے عمل پر غور کرتے ہوئے پرنٹ اور الیکٹرانک میڈیا کے ذریعے وسیع تشہیر موجودہ تعلیمی سیشن کے دوران نشستوں کے صد فیصد استعمال پر زور دیا۔اِس سے قبل ڈاکٹر اصغر حسن سامون نے آئی ٹی آئی بانہال کا دورہ کیا اور اُنہوں نے وہاں تجارت اور ورکشاپوں کا معائینہ کیا ۔ اُنہوں نے موجودہ تجارت پر خوشی کااِظہار کرتے ہوئے کہا کہ اس آئی ٹی آئی میں پڑھائے جانے والے تمام ٹریڈز کو نہ صرف ان کی طرف سے بلکہ مزید ٹریڈس کے ذریعے بھی بڑھایا جائے گا۔دریں اثنا ضلع ترقیاتی کمشنر نے پرنسپل سیکرٹری کو پولی تکنیک کالج رام بن کے تعمیراتی کام میں پیش رفت کی راہ میں حائل رکاوٹوں سے آگاہ کیا اور جاری منصوبے کو مکمل کرنے کے لئے ترجیحی بنیادوں پر تمام رُکاوٹوں کو حل کرنے کے لئے علاوہ آئی ٹی آئی رام بن کی نئی عمارت کا تعمیراتی کام شروع کرنے کی یقین دہانی کرائی۔پرنسپل سیکرٹری نے کہا کہ ٹیکنیکل ایجوکیشن ڈیپارٹمنٹ یہاں نوجوانوں کو فنی تربیت کے لئے راغب کرنے کی کوشش کر رہا ہے تاکہ وہ مختلف کاروباری یونٹس شروع کرنے کے ساتھ ساتھ مختلف جاری قومی پروجیکٹوں میں روزگار حاصل کرسکیں ۔ پرنسپل سیکرٹری نے نوجوانوں کو مشورہ دیا کہ وہ پولی تکنیک کالجوں اور آئی ٹی آئی میں تربیت حاصل کریں تاکہ دستیاب شعبوں میں کئیر یر کے بہتر مواقع حاصل کئے جاسکیں۔
